Panalangin patungo sa landas ng Diyos
Panalangin para matagpuan ng ibang Tao ang landas patungo sa Diyos
“At makikita ang Anak ng Tao na nasa alapaap, dumarating na may dakilang kapangyarihan at kaluwalhatian” – Marcos 13:26
Walang simula’t walang hanggan, mapagmahal na Ama sa langit, ang Espirito mo ay nasa lahat ng dako ng sansinukob at sandaigdigan at ang puso ay nagmamahal sa lahat, dinggin mo ako ngayon sa aking panalangin, at palakasin mo ang aking pananalig sa iyong di-magmamaliw na pag-ibig.
Ako ay lubos na natutuwa sa iyo, mahal na Ama, kaya kung minsan nais kong basta na lang sumigaw: “Gloria, halleluiah!” At nais kong ikalat ang iyong mensahe sa buong daigdig.
Pagkat marami sa aking pamilya at sa ibang lugar ang may mabigat na dinadala, na nangangailangan ng napakalaking halaga. O, kung maipakikita ko lamang sa kanila kung anong ligaya ang kakamtin nila kapag namuhay sila ayon sa iyong mga kautusan at sa ilalim ng iyong pag-ibig!
Hindi iyan madaling gawin kung salita at lakas ko lamang ang aasahan, Amang mahal. Ngunit alam kong nangako kang palalakasin ang lahat na tumawag sa iyo. Kaya sana, Ama, tulungan mo akong ipakita sa kanila kung paanong ang pag-ibig ko sa iyo ay bumago nang malaki nang lubos sa akin. Sa gayon, mauunawaan nila kung ano ang nagagawa ng iyong pag-ibig.
Tunay, ngayon pa lang ay nakikita ko na ang mga pagbabagong naganap sa ilang nilalang na hinatiran ko ng Mabuting Balita, mahal na Ama. Pero tulungan mo ako na patotohanan ang iyong mapagpalang kapangyarihan doon sa mga taong ayaw pa ring makinig. Tulungan mo akong maging mapagtimpi hanggang ang iyong espirito ay pumuspos sa kanila gaya ng pagpuspos nito ngayon sa akin.
Gawaran mo ako at lahat ng nagdurusang kaluluwa ng kaginhawahan, katiwasayan, at kapayapaan! Amen.
Tags: Panalangin patungo sa landas ng Diyos
Posted in Tagalog Daily Prayers | No Comments »
Panalangin para gabayan sa pakikipagkaibigan
Panalangin para gabayan Ako ng Diyos sa mga kasayahang dulot ng Pakikipagkaibigan
“May pagkakaibigang madaling lumamig Ngunit may kaibigang higit pa sa kapatid” – Kawikaan 18:24
Makapangyarihang Diyos, pag-ibig mo’y hindi ko lubos na matatalos at ang karunungan at kabutihan mo ay walang hangganan. Ang pinakamahalagang sandali ng aking buhay ay lapitan ka para makilala ka nang lubos bilang aking tunay na kaibigan at tagapangalaga.
Ngunit kadalasan, mahal na Ama, ako ay nangungulila; gusto kong magkaroon ng mga kaibigan dito sa mundo mabubuting lalake at babae. Kay rami nang nilalang ang dumaan sa aking harapan at hindi man lang sila bumati, o tumango, o ngumiti sa akin. Ama, sobra ang lungkot ko sa ganoong mga pangyayari.
Pagkat alam mo na nais kong madama na ako’y mahalaga, kailangan, at minamahal dito sa mundo. Alam mo kung gaano katindi ang pagsisikap kong maghanap ng mga kaibigang tunay at tapat.
Sana, mahal na Ama, tulungan mo akong magkaroon ng tunay at tapat na mga kaibigan. Tulungan mo akong kagiliwan ng ibang tao nang matupad ko ang iniutos mo. Kapag may nakaharap akong ibang tao, saan mang lugar, sana ay tulungan mo akong maging magiliw sa kanila. Sana ay tulungan mo akong mag-isip ng mga bagay para sa ikabubuti ng aking kapwa, sa halip ng kung ano ang magagawa nila para sa akin. At tulungan mo ako, mahal na Ama, na pawang magagandang impresyon ang isasaisip at ikukwento ko tungkol sa kanila. Sa gayong paraan, alam ko, ako’y bibiyayaan mo ng maraming kaibigan.
Mas maginhawa ang pakiramdam ko ngayong ako’y nananalangin sa iyo, mahal na Ama. Maaasahan kang kaibigan kaya’t alam kong tutulungan mo ako. Payapa ako pagkat alam kong dininig mo ang aking panalangin para ako’y magkaroon ng mga kaibigan. Sa ngalan ni Hesus, hinihiling ko ito. Amen.
Tags: Panalangin para gabayan Ako ng Diyos sa mga kasayahang dulot ng Pakikipagkaibigan, Panalangin para gabayan sa pakikipagkaibigan
Posted in Tagalog Daily Prayers | No Comments »
