Panalangin para sa trabaho
Panalangin para tulungan Ako ng Diyos na maghanap ng trabaho
“Huwag mong pababayaan ang ipinagkaloob sa iyo ng Espiritu Santo” — 1 Timoteo 4:14
O Panginoon, Liwanag ko sa landas ng buhay, nababatid mo ang aking kalagayan mula nang ako’y isinilang. Tulungan mo akong maging payapa at marinig ang iyong tinig nang aking mabatid ang dapat kong gawin at kung saan ako patutungo.
Pagkat iniutos mo, mahal na Ama, na walang sinuman ang dapat mag-aksaya ng panahon. Sinubok kong sundin ang gayong utos. Ngunit minsan, napababayaan kong tunay ang mga ipinagkaloob mong talino sa akin na ako ay wala sa lugar na dapat kong kalagyan.
Mahal na Ama, sana ay tulungan mo akong hanapin ang trabahong tamang-tama sa akin, kung hindi ko pa iyon taglay ngayon. Alam kong gagabayan mo ako sa gawaing nais mong isagawa ko. At kapag natagpuan ko na ang tamang trabaho para sa akin, mahal na Ama, tulungan mo akong gawin iyon nang mahusay. Tulungan mo akong magtrabahong kasama ng iba, mag trabaho nang buong sipag at mag-impok, maging masinop at malinis, at, higit sa lahat, magkaroon ng tunay na pananalig sa iyong binabalak para sa akin.
Anumang hawakan ng aking mga kamay, mahal na Ama, sa tahanan o kabukiran o pagawaan, tulungan mo akong isaayos nang mahusay gawin iyon nang buong husay at lubos. Tunay na nadarama kong sa pagtatrabaho nang ayon sa iyong kalooban, ako ay itataguyod mo sa lalong mabuting gawain at mas maraming gantimpala.
Mahal na Ama, ako ay tunay na nananalig sa iyo. Nadama ko na kung paano mo ako gabayan sa trabaho ko noon alam kong madarama kong muli iyon kung mataman akong makikinig at magsisikap na umunawa. At lubos kitang pinasasalamatan sa iyong paggabay at pagtataguyod dahil dito, nakaya kong muling harapin ang mundo ng may pag-asa at matibay na pananalig. Sa ngalan ni Hesus ako’y dumadalangin. Amen.
Tags: Panalangin para tulungan Ako ng Diyos na maghanap ng trabaho
Posted in Tagalog Daily Prayers | No Comments »
Panalangin para dinidining ng Diyos ang Aking mga dalangin
Panalangin para Ako’y laging manalig na dinidining ng Diyos ang Aking mga dalangin
“Kaya’t lumapit tayo sa Diyos nang may tapat na kalooban at matibay na pananalig sa kanya” — Hebreo 10:22
Kahanga-hangang Diyos, aking Ama sa langit, hindi ako pababayaan ng iyong walang-hanggang pag-ibig. Dumudulog ako sa iyo tulad ng isang pagod na musmos na matagal nang nawalay sa kanyang magulang.
O, lubos kitang pinasasalamatan para sa kapayapaang ito, malayo sa mabigat na trabaho at mga pangamba. Nais kong makipag-usap sa iyo at maglakad nang kasama ka at nais kong angkining ikaw ay ama ko!
Ikaw lamang ang nakaalam, aking Ama sa langit, kung gaano kabigat ang aking dala-dalang pasanin. Wala akong makausap sinuman. Alam mo kung gaano ako kadalas manalangin, subalit ang isip ko’y lumilipad, malayung-malayo sa inuusal ng aking bibig.
Alam mo kung gaano ko kadalas kinailangang manalig na dinidinig mo ang aking dalangin.
Ibigay mo uli sa akin ang gayong pananalig, mahal na Ama malalim, tunay, at walang maliw na pananalig. Tulad ng isang musmos na may mapagmahal na ama, hayaan mong ipaubaya ko sa iyo ang aking kapalaran. Hayaan mong magkalapit tayo at tumatag ang aking pananalig. Bigyan mo ako ng pananalig, pananalig na ikaw ay laging nakikinig sa aking mga dalangin at palagi kang tumutugon nang buong dunong!
Tulungan mo ako, mabait na Ama, na madamang ako’y may gayong kalakas na pananalig sa lahat ng oras, malulungkot man o masasayang sandali. Punuin mo ako ng pananalig na makapananaig sa mga bagyo ng buhay, pananalig na bawat dalangin ko’y sinasagot mo sa iba’t ibang paraan!
Ibigay mo sa akin ang pananalig na magpapaligaya sa akin gaya ngayon masigla, mapagpasalamat, at maginhawa. Amen.
Tags: Panalangin para Ako'y laging manalig na dinidining ng Diyos ang Aking mga dalangin
Posted in Tagalog Daily Prayers | No Comments »
