Panalangin para sa Buhay na walang hanggan sa Langit
Panalangin para sa Buhay na walang hanggan sa Langit
“Ako ang muling pagkabuhay at ang buhay. Ang nananalig sa akin, kahit mamatay ay muling mabubuhay” — Juan 11:25
Walang hanggang Ama, ikaw ang saligan ng aking buhay. Ikaw ang aking lakas. Ikaw ang sa akin ay nagbibigay ng ginhawa at kasiyahan. Nagpapasalamat ako pagkat kinalinga mo ako nang ako’y manalangin sa iyo.
Alam mong madalas kong ikalungkot ang namamayaning hapis at kapanglawan sa daigdig. Alam mong malimit sumagi sa isip ko ang aking mga mahal sa buhay na yumao na, at tinatanong ko ang sarili kung nasaan na sila. Payapa at maligaya ba sila sa kinaroroonan nila?
O, mahal na Ama, tulungan mo akong kayanin ko ang aking lungkot at pangungulila. Palakasin mo ang aking pananalig sa iyo nang higit pa sa dati. Turuan mo akong maunawaan na ang buhay at kamatayan, ang lungkot at saya ay bahagi ng iyong dakilang plano para sa akin. Turuan mo akong kumilos nang pasulong, hindi paurong; tumingin sa itaas, hindi sa ibaba.
Lapitan mo ako ngayon at bigyan ako ng kaginhawahan, mahal na Ama. Tulungan mo ako nang husto at nawa’y madama ko na si Hesus talaga ang muling pagkabuhay at ang buhay. Tulungan mo akong maunawaan na sinumang maniwala sa kanya ay magtatamo ng buhay na walang hanggan sa kanyang kaharian sa langit. Tulungan mo akong maunawaan na ang aking mga mahal sa buhay ay ligtas at masaya sa piling mo na ikaw mismo ang pumahid sa kanilang luha.
Anong laking ginhawa ang aking nadama kahit na inihinga ko lang sa iyo ang aking kalungkutan, mahal na Ama. Totoo, ako ngayo’y nagpa-pahinga rito nang tahimik at payapa pagkat alam ko na ako’y mamahalin at kukup-kupin mo magpakailan man, sa pamamagitan ng aming Panginoon at Tagapagligtas, si Hesukristo. Amen.
Tags: Panalangin para sa Buhay na walang hanggan sa Langit
Posted in Tagalog Daily Prayers | No Comments »
Panalangin para aliwin sa kalungkutan
Panalangin para Ako’y aliwin ng Diyos sa aking kalungkutan
“Aaliwin kita sa Jerusalem, Tulad ng pag-aliw ng ina sa kanyang anak” — Isaias 66:13
Ama ng walang hanggang awa at aliw, kinahahabagan mo ang lahat ng tao, hayaan mong damhin ko ang iyong pagdamay ngayong ako’y nagdarasal.
At anong laki ng pasasalamat ko nang ako’y kinupkop ng iyong pagmamahal nang ako’y manalangin, mahal na Ama. Hindi ko na kailangan pang sabihin sa iyo ang aking lungkot at pangungulila, pagkat alam kong alam mo na ang mga dinanas ko.
Subalit sa gitna ng aking paghihirap, mahal na Ama, nadiskubre kong may dulot na ginhawa at saya ang pagbubukas-loob sa iyo sa pamamagitan ng dalangin. Nagpapasalamat ako sa iyo sa pribilehiyong ito, mahal na Ama, at ipagpaumanhin mo na madalas kong makaligtaang manalangin.
Sana, mapagmahal na Ama, tulungan mo akong kayanin ko ang aking lungkot at pangungulila. Tulungan mo akong maunawaan na tanging sa iyo ko lamang matatagpuan ang tunay na kaligayahan. Palakasin mo ang aking pananalig, mahal na Ama, upang ako’y malugod sa iyong pag-ibig.
Turuan mo akong tanggapin na ang lungkot ay panandalian lamang subalit ang ligayang pangako mo ay pangmatagalan. Turuan mo akong malibang sa pagsasagawa ng aking mga pang araw-araw na gawain upang sa paglipas ng oras ay mawala ang mga lumiligalig sa akin. Tulungan mo akong dumamay sa kalungkutan ng kapwa’ ko upang ang sarili kong lungkot ay maihinga ko rin sa kanya, at nang gumaang ang aking dinadala.
Maski ang munting dalanging ito ay napasaya ako, mahal na Ama. Pakiramdam ko ay mas napalapit ako sa iyo, kumpara noon, noong kaytagal nang panahon iyon. At sa unang pagkakataon, ako’y totoong nagsimulang makakita ng bahagyang sinag ng liwanag, liwanag ng kaligayahan muli. Amen.
Tags: Panalangin para Ako'y aliwin ng Diyos sa aking kalungkutan
Posted in Tagalog Daily Prayers | No Comments »
